Azərbaycan Üzgüçülük Federasiyasının prezidenti: Su idman növlərinin hər bir sahəsində inkişafa nail olmaq istəyirik
Bu sözləri jurnalistlərə açıqlamasında Azərbaycan Üzgüçülük Federasiyasının prezidenti Zaur Əliyev deyib.
O, Bakıda səfərdə olan Avropa Su İdmanı Növləri Federasiyasının prezidenti Antoniu Silva ilə keçirdikləri görüşə diqqət çəkərək deyib: “Görüş zamanı Gənclər və İdman Nazirliyinin strategiyasına uyğun idmanın inkişafının yollarından bəhs etdik. Su idman növləri ilə bağlı da geniş müzakirələr apardıq. Bu barədə növbəti 10 ildə görəcəyimiz işlər barədə danışdıq. Əsas məqsədlərimizdən biri də kütləviliyin artırılmasıdır. Gənclər və İdman Nazirliyi bununla bağlı bir çox layihələr həyata keçirir. Çox gözəl haldır ki, məktəblərdə uşaqların üzgüçülük dərslərində iştirak etməsinə şərait yaradılır. Daha çox məktəbliyə onların dərs saatlarına mane olmadan üzmə bacarıqlarını öyrətmək istəyirik. Əminəm ki, həmin uşaqlar arasında potensialı olanlar aşkar ediləcək və bizi beynəlxalq arenada uğurla təmsil edəcəklər”.
Federasiya rəhbəri milli komandanın iştirak edəcəyi əsas yarışdan da bəhs edib: “Bu ilin yayında Sinqapurda dünya çempionatı təşkil olunacaq. Artıq üzgüçülərimizdən 3-ü həmin mundiala lisenziya qazanıb. Ümid edirik ki, digər idmançılarımız da yarışda iştirak etmək üçün lisenziya əldə edə biləcəklər”.
