Bu gün, iyulun 15-də Türkiyədə Fetullah Gülenin başçılıq etdiyi “Paralel dövlət” adlı terror təşkilatı üzvlərinin hakimiyyəti zorla zəbt etməsi cəhdinin qarşısının alınmasının səkkizinci ildönümü qeyd edilir.
Türkiyə hökumətinin qərarı ilə iyulun 15-i ölkədə Demokratiya və Milli Birlik Günü və qeyri-iş günü elan edilib. Səkkiz il əvvəl, həmin gün Prezident Rəcəb Tayyib Ərdoğanın müraciəti ilə yüz minlərlə insan şəhərlərin küçələrinə axışaraq FETÖ terror təşkilatının planlarını pozub.
Qardaş ölkədə 2016-cı il 15-16 iyul hadisələri zamanı 252 nəfər həlak olub. Hər il Türkiyə və onun hüdudlarından kənarda keçirilən tədbirlərdə onların xatirəsi anılır. Küçələrə və məktəblərə bu qəhrəmanların adları verilib, onların heykəlləri ucaldılıb və muzeyləri açılıb.
Bu gün Türkiyənin 90 min məscidində 15 iyul hadisələrində həlak olmuş qəhrəmanların ruhuna dualar oxunacaq.
Gülenin iyul hadisələrində iştirak edən tərəfdarlarının bir çoxu həbs edilib, bir hissəsi isə beynəlxalq axtarışa verilib. Bununla yanaşı, terrorçularla əlaqədə şübhəli bilinən 704 554 şəxs istintaqa cəlb olunub, 289 məhkəmə prosesi həyata keçirilib, onların qətnamələri ilə çevriliş cəhdində iştirak edən 4 981 nəfər barəsində hökm çıxarılıb. Onların 85-i keçmiş generallardır.
Terrorçu dəstənin başçısı Fetullah Gülen hazırda ABŞ-ın Pensilvaniya ştatındadır. Ankara onun ekstradisiyası üçün Vaşinqtonla danışıqlar aparır.