Özbəkistan Prezidenti ticarət marşrutlarının şaxələndirilməsi göstərişini verib
Prezident Mirziyoyev iyunun 23-də xarici ticarət və nəqliyyat logistikasında təxirəsalınmaz tədbirlərə dair keçirdiyi müşavirədə Yaxın Şərqdəki qeyri-sabitlik fonunda yük axınının daha təhlükəsiz limanlara yönləndirilməsinin vacibliyini vurğulayıb, xarici ticarət və nəqliyyat marşrutlarına yenidən baxılması barədə göstəriş verib. O qeyd edib ki, bu sahədə logistika xərclərinin artacağı gözlənilir.
Özbəkistan Prezidenti deyib: “Son günlər Yaxın Şərqdə aparılan hərbi əməliyyatlar onsuz da qeyri-sabit vəziyyəti daha da gərginləşdirib. Bu, şübhəsiz ki, Özbəkistanın xarici iqtisadi əlaqələrinə və qlobal bazarlara çıxışına təsir edir. Bu kontekstdə vəziyyəti obyektiv qiymətləndirmək, xarici ticarət, investisiyalar və nəqliyyat kimi əsas sahələrdə çevik tədbirlər görmək vacibdir”.
Şavkat Mirziyoyev xarici ticarət, investisiya siyasəti və nəqliyyatda əsas istiqamətlərə yenidən baxmağı tapşırıb. O əlavə edib ki, ilkin hesablamalar bu dəyişikliklərin logistika xərclərini 30 faizə qədər artıra biləcəyini diqqətə çatdırıb.
Özbəkistanın dövlət başçısı, həmçinin tərəfdaş ölkələrlə alternativ marşrutların əlaqələndirilməsini və ixracyönümlü müəssisələrə dəstək göstərməyi tapşırıb.
Müşavirədə qeyd edilib ki, İran ərazisindən bir sıra iri beynəlxalq nəqliyyat dəhlizləri, o cümlədən Mərkəzi Asiya - Bəndər Abbas limanı marşrutu (Türkmənistan vasitəsilə), Mərkəzi Asiya - İran - Türkiyə və Körfəzdən İran, Azərbaycan və Gürcüstandan keçən Cənub-Qərb dəhlizi (Poti limanı) keçir və Ukrayna və Polşaya qədər davam edir.
Digər marşrutlara İran - Türkiyə - Bolqarıstan - Rumıniya - Almaniya daxildir. Bundan əlavə, Tehran üç əsas təşəbbüsün iştirakçısıdır: Beynəlxalq “Şimal-Cənub” Nəqliyyat Dəhlizi (INSTC), Aşqabad sazişi və Çabahar limanı.
Özbəkistan, həmçinin Qazaxıstan, Xəzər Aktau limanı, Azərbaycan (Bakı) və Gürcüstandan (Batumi və Poti) keçən və Avropa bazarlarına çıxışı təmin edən Trans-Xəzər Beynəlxalq Nəqliyyat Marşrutu (TITR) vasitəsilə ixracını genişləndirir. Ənənəvi Şimal Dəhlizi (Özbəkistan - Qazaxıstan - Rusiya - Belarus - Şərqi Avropa) geosiyasi qeyri-sabitlik və Rusiyaya qarşı davam edən sanksiyalar səbəbindən getdikcə mürəkkəbləşir.
