Bu gün 120 saylı Cəbrayıl-Qubadlı seçki dairəsi üzrə Qaradağ rayon Lökbatan qəsəbəsində yerləşən seçki məntəqəsində səs verdim. Seçicilərin fəallığı müşahidə olunur. Budəfəki parlament seçkiləri əvvəlkilərdən fərqlidir.
Bu fikri AZƏRTAC-a müsahibəsində “Kredo” qəzetinin baş redaktoru şair-publisist Əlirza Xələfli söyləyib.
“Azərbaycanın ərazi bütövlüyü tam təmin olunub, Qarabağda terrorçuların kökü kəsilib, erməni separatçıları ölkədən qovulub, cinayətkarlar həbs edilib və mühakimə olunacaq. Beləliklə, ilk dəfə Azərbaycan xalqı öz torpaqlarının tam sahibi olaraq parlament seçkilərinə səsvermədə iştirak edir. Biz sovet dövründəki seçkiləri Azərbaycan tarixi üçün başqa bir siyasi mərhələnin siyasi həyatı kimi başa düşürüksə, müstəqillik dövründəki seçkilər tamam fərqlidir. Burada insanlar azad şəkildə öz fikrini, məramını ifadə edir. Amma bu seçki indiyə qədər keçirilmiş bütün seçkilərdən fərqlidir. Bir daha səsləndirirəm: bu, ərazi bütövlüyünü təmin etmiş xalqın Azərbaycanın hər bir ərazisində keçirdiyi seçkidir”, - deyə şair-publisist fikrini yekunlaşdırıb.