Maliyyə olmadan iqlim dəyişikliyinin mənfi təsirini aradan qaldıra bilmərik.
Bu barədə Azərbaycan Respublikası Prezidenti Administrasiyasının Xarici siyasət məsələləri şöbəsinin müdir müavini, COP29 Təşkilat Komitəsi Katibliyinin rəhbəri Həbib Mikayıllı “COP29-a aparan yol - Dayanıqlı və Davamlı Gələcək” adlı 29-cu Ali Səviyyəli Toplantıda “Balanslaşdırma, Azaltma, Uyğunlaşma və Dayanıqlıq” adlı panel müzakirəsində çıxışı zamanı deyib.
“Altı ay ərzində əldə etdiyimiz nailiyyət ondan ibarətdir ki, bizim COP29 komandamız dünya paytaxtlarına səfər edib, onların fikirlərini eşitmək, prioritetlərini anlamaq, mövqe tutmaq üçün müxtəlif danışıqlar qruplarına daxil olan ölkələrlə məsləhətləşmələr aparıb və bu, kifayət qədər uğurlu olub.
Yeni layihədə vurğulandığı kimi, burada bir neçə şərti məsələ var. Amma hazırda mən kifayət qədər optimistəm ki, biz böyük təsir göstərə bilərik”,- deyə o bildirib.
Qeyd edək ki, bu Yüksək Səviyyəli Görüşün əsas məqsədi Bakıda COP29-un uğurunu təmin etmək üçün bütün aidiyyəti tərəflərin birgə fəaliyyətini təmin etməkdir.
Bakıda keçiriləcək COP29-a hazırlıq onun iqlim fəaliyyətində mövcud qlobal çağırışlara və imkanlara cavab verməsini təmin etmək üçün çoxşaxəli yanaşmanı əhatə edir.