Azərbaycan Yazıçılar Birliyinin (AYB) Sumqayıt bölməsinin təşkilatçılığı ilə şəhərin Poeziya evində 22 İyul – Milli Mətbuat Günü ilə əlaqədar bir qrup jurnalistlə görüş keçirilib.
Tədbirdə Sumqayıt bölməsinin sədri Gülnarə Cəmaləddin çıxış edərək media nümayəndələrini Milli Mətbuat Günü münasibətilə təbrik edib, onlara yaradıcılıq uğurları arzulayıb.
“Biz gözəl tarixi hadisələrə şahidlik edirik. Bu il Azərbaycanda milli mətbuatın, ana dilində ilk qəzetin nəşrə başlamasının 149 ili tamam olur. 1875-ci ilin iyulun 22-də görkəmli maarifçi, publisist, mütəfəkkir Həsən bəy Zərdabinin əsasını qoyduğu "Əkinçi" qəzeti ilə xalqımızın milli ruhunun formalaşmasında yeni mərhələ oldu”, - deyən G.Cəmaləddin qeyd edib ki, bu il həm də Sumqayıtın şəhər statusu almasının 75 və Azərbaycan Yazıçılar Birliyinin 90 ili tamam olur. Söz və mətbuat cəmiyyətin və dövlətin demokratik inkişaf göstəricisi kimi qəbul olunur. Azərbaycan milli mətbuatı zəngin inkişaf yolu keçib, milli oyanış prosesində müstəsna rol oynayıb.
Sumqayıt Şəhər İcra Hakimiyyətinin şöbə müdiri Fərman Kazımov çıxışında mətbuatı ictimai fikir tariximizin mühüm tərkib hissəsi kimi dəyərləndirərək onun keçdiyi şərəfli və keşməkeşli yoldan danışıb, bütün dövrlərdə qabaqcıl ideyaların carçısı olduğunu söyləyib. O, Vətən müharibəsində qazandığımız tarixi Zəfərimizdə mətbuatın rolunu vurğulayaraq Qarabağ həqiqətlərinin dünyaya çatdırılmasında misilsiz xidmətlərini qeyd edib.
Görüşdə iştirak edənlər Azərbaycanın müstəqillik əldə etdikdən sonra mətbuat sahəsində qazandığı uğurlardan, həmçinin ölkə və region mətbuatının hazırkı problemlərindən danışıblar, fəaliyyətləri ilə bağlı təəssüratlarını bölüşərək göstərilən diqqətə görə təşəkkür ediblər.
Sonda AYB Sumqayıt bölməsi ilə səmərəli əməkdaşlıq edən bir qrup jurnalistə qurumun fəxri fərmanı və hədiyyələr təqdim edilib. Faydalı əməkdaşlığın bundan sonra da uğurla davam edəcəyinə əminliyik ifadə olunub.