Azərbaycan qlobal neft-qaz sənayesində əsas oyunçu və təsdiqlənmiş neft ehtiyatlarına görə dünyada 20-ci yerdə olsa da, onun yaşıl inkişaf strategiyasının əsas sütunlarından biri bərpaolunan enerji infrastrukturunun sürətlə genişləndirilməsidir.
Bu barədə “Arab News” qəzetində dərc olunan məqalədə bildirilib.
Məqalədə qeyd olunub ki, COP29 tədbiri ərəfəsində ev sahibi ölkə kimi Azərbaycan yaşıl inkişaf məqsədlərinə nail olmaq üçün səylə çalışır.
“Ölkə ənənəvi enerjidən asılılığını azaltmaq, bərpaolunan enerjiyə keçid və iqlim dəyişikliyi ilə mübarizə istiqamətində qlobal səylərdə iştirak etmək üçün əhəmiyyətli dəyişikliklər edib”, - deyə məqalədə bildirilib.
Diqqətə çatdırılıb ki, 2020-ci ildə Azərbaycanın Energetika Nazirliyi ilə BƏƏ-nin “Masdar” şirkəti arasında ölkədə ilk günəş enerjisi qurğusunun – 230 meqavat gücündə Qaradağ Günəş Elektrik Stansiyasının yaradılmasına dair saziş imzalanıb: “Layihə 550 hektar ərazini əhatə edir və hazırda günəşin birbaşa işığını və yerdən günəş işığının əksini çəkən 570 min ədəd ikiüzlü fotovoltaik panellərə malikdir”.
Qaradağ Günəş Elektrik Stansiyasının ölkə üzrə meneceri Murad Sadıxov “Arab News”a müsahibəsində bildirib ki, qurğu indiyədək 24 qiqavat enerji istehsal etmək gücünə çatıb: “Lakin biz qarşıya 2032-ci ilə qədər 100 qiqavat hədəfinə çatmaq üçün çox iddialı bir məqsəd qoymuşuq”.
Məqalədə vurğulanıb ki, Azərbaycan bərpaolunan enerji layihələrinin həyata keçirilməsi ilə yanaşı, həm də öz cəmiyyətini ənənəvi yanacaq tutumlu nəqliyyat vasitələrinin istifadəsindən yaşıl nəqliyyat növlərinə keçməyə təşviq edir.
“Hökumət elektrik avtomobillərin istifadəsini təbliğ edir. Elektromobilliyin inkişafı üçün plan həyata keçirilir, həmçinin ixtisaslı kadrlar işə götürülüb. Elektrik nəqliyyat vasitələrindən istifadəni maksimallaşdırmaq üçün özündə vergi güzəştini ehtiva edən yeni qanun layihələri hazırlanıb ki, bu, ictimai nəqliyyatda da elektrik nəqliyyat vasitələrini təşviq edir”,- deyə məqalədə vurğulanıb.
Qeyd olunub ki, Azərbaycan, həmçinin ekoloji cəhətdən təmiz təcrübələr haqqında ictimaiyyətin məlumatlılığının artırılmasına və davamlı inkişaf sahəsində gələcək nəsil mütəxəssislərin hazırlanmasına böyük sərmayə yatırır.