Oktyabrın 4-də Milli Məclisin İnsan hüquqları komitəsinin 2024-cü ilin payız sessiyasında ilk iclası keçirilib.
İclası açan komitə sədri Zahid Oruc komitənin üzvlərini VII çağırış Milli Məclisə seçilmələri münasibəti ilə təbrik edib və onlara gələcək fəaliyyətlərində uğurlar arzulayıb.
O, diqqətə çatdırıb ki, iclasın gündəliyinə iki məsələ - İnsan hüquqları komitəsinin 2024-cü ilin payız sessiyası üçün iş planının layihəsi və “Uşaq hüquqları haqqında” Qanunda dəyişiklik edilməsi barədə qanun layihəsi (birinci oxunuş) daxil edilib.
Komitə sədri gündəliyin birinci məsələsi ilə bağlı bildirib ki, sənəddə qanunvericilik subyektlərindən daxil olacaq qanun layihələrinin müzakirəsi, o cümlədən müxtəlif qanun layihələrinə əlavə və dəyişikliklərin edilməsi nəzərdə tutulub. İş palanında Ermənistanın azərbaycanlılara qarşı həyata keçirdiyi soyqırım, etnik təmizləmə və deportasiya cinayətləri nəticəsində vətəndaşlarımızın pozulmuş insan hüquqlarının bərpası, rəqəmsal məkanda vətəndaşların hüquqlarının qorunması ilə bağlı, həmçinin ölkəmizdə 2024-cü ilin “Yaşıl dünya naminə həmrəylik ili” elan edilməsi və COP29 qlobal iqlim sammitinin keçirilməsi aspektində və digər istiqamətlərdə insan hüquqlarının aktual məsələlərinə həsr olunmuş müvafiq müzakirələrin, dinləmələrin və digər tədbirlərin keçirilməsi əks olunub.
Gündəliyin ikinci məsələsi olan “Uşaq hüquqları haqqında” Qanunda dəyişiklik edilməsi barədə qanun layihəsi (birinci oxunuş) ilə bağlı komitə sədri qeyd edib ki, layihədə təklif olunan dəyişikliklər uşaq müəssisələrində xidmətlərin keyfiyyətinin yüksəldilməsinə, uşaq hüquqlarının həyata keçirilməsinin təkmilləşdirilməsinə xidmət edir.
Fikir mübadiləsi şəraitində keçən müzakirələrdə komitə sədri Zahid Oruc, komitə sədrinin müavini Arzuxan Əlizadə, Hikmət Məmmədov, Mübariz Qurbanlı, Sevil Mikayılova, Bəhruz Məhərrəmov, Səyyad Salahlı, Azər Allahverənov, Razi Nurullayev, Vüqar Rəhimzadə, Tural Gəncəliyev, Naqif Həmzəyev, Milli Məclis Aparatının Sosial qanunvericilik şöbəsinin müdiri Adil Vəliyev çıxış edərək gündəlikdəki məsələlərlə bağlı fikirlərini bildiriblər, rəy və təkliflərini səsləndiriblər.
İclasda komitənin qarşıdakı sessiyası üçün iş planı təsdiqlənib, müzakirə olunan qanun layihəsi Milli Məclisin plenar iclasına tövsiyə olunub.
İclasda deputat Mircəlil Qasımlı və digər rəsmi şəxslər iştirak edib.

Milli Məclisin Mətbuat və
ictimaiyyətlə əlaqələr şöbəsi